Dritan Dajti këmbëngul për të votuar në 25 Qershor, ankohet në gjykatë

Ka nisur një valë kërkesash të të burgosurve të cilët po kërkojnë nëpërmjet gjykatës që emrat e tyre të përfshihen në listat e votimit. Burime për “Report Tv” nga Drejtoria e Burgjeve bëjnë me dije, se më 25 Qershor pritet të votojnë mbi 2000 të paraburgosur që ende s’janë dënuar me vendim të formës së prerë. Ndërkohë 3 ditë para datës së zgjedhjeve në Gjykatën e Tiranës të drejtën për të votuar e kanë kërkuar emra VIP që gjenden të prangosur, por ende nuk ka një vendim dënimi të formës së prerë, si ish deputetit  Mark Frroku, Dritan Dajti dhe Gilmando Dani.

Gjykata e Tiranës është shprehur se këto kërkesa do të shqyrtohen me përparësi, ndërsa në total shtetasit që kërkojnë të futen në listën e zgjedhjeve nga institucionet e vuajtjes së dënimit janë deri më tani 70 persona. Për herë të parë me hyrjen në fuqi të ligjit të dekriminalizimit e drejta e votimi i hiqet personave të dënuar me vendim të formës së prerë, të cilët nuk do të mund të votojnë.