Hetimi i SPAK për çështjen e KAYO-s është zgjeruar me kontrolle dhe sekuestrime në disa prej personave që dyshohet se kanë lidhje me aktivitetin e shoqërisë. Në kuadër të veprimeve hetimore, agjentët e SPAK kanë kontrolluar banesën e biznesmenit izraelit Ron Yeffet, ndërsa i është sekuestruar edhe telefoni, me qëllim verifikimin e komunikimeve dhe të dhënave që mund të ndihmojnë hetimin.
Në të njëjtën procedurë është përfshirë edhe Ardi Veliu, drejtuesi i KAYO-s dhe ish-drejtues i Policisë së Shtetit. Kontrollet kanë prekur gjithashtu biznesmenen Arjeta Puca, e cila dyshohet se ka pasur marrëdhënie bashkëpunimi me Yeffet dhe se së bashku kanë investuar në një aktivitet privat. Detaje të reja mbi mënyrën se si ka nisur dhe po zhvillohet hetimi janë bërë publike nga gazetari Elton Qyno. Sipas tij, procedimi është regjistruar pas një deklarate të ish-zëvendëskryeministrit Arben Ahmetaj.
Pas nisjes së procedimit, SPAK ka ndërmarrë një seri veprimesh, duke kryer kontrolle në ambiente private dhe vende pune, ndërsa në fokus kanë qenë edhe telefonat, komunikimet elektronike dhe dokumentacioni financiar e kontraktual. “Janë sekuestruar një sërë kontratash. Hetimi është ende në fazën fillestare dhe për këtë arsye detajet janë të pakta”, ka deklaruar Qyno. Sipas gazetarit, hetimi nis me Ron Yeffet dhe më pas shtrihet te Ardi Veliu dhe persona të tjerë të përfshirë në aktivitetin e KAYO-s, mes tyre edhe Aleks Marku.
Një nga elementët që po verifikohet lidhet me mënyrën se si certifikohen fondet që kalojnë nga Ministria e Mbrojtjes. Sipas Qynos, Marku është personi që kryen certifikimin për çdo fond që kalon nga ministria drejt kësaj strukture. KAYO është një shoqëri aksionere e krijuar nga Ministria e Mbrojtjes, me Ardi Veliun në drejtim. Brenda saj janë krijuar edhe pesë shoqëri të tjera, ku struktura e pronësisë ndryshon nga njëra shoqëri te tjetra.
Në një prej tyre, KAYO zotëron 49% të aksioneve, ndërsa pjesa tjetër kontrollohet nga privatë. Pikërisht marrëdhëniet mes strukturave publike dhe interesave private, si dhe lëvizjet financiare e kontratat e lidhura mes tyre, janë pjesë e verifikimeve që po kryen SPAK. Hetimi ndodhet në fazat e para dhe deri në këtë moment nuk ka një përfundim zyrtar mbi përgjegjësinë e personave të përfshirë. Veprimet e SPAK janë pjesë e hetimit dhe nuk përbëjnë në vetvete provë përfundimtare të një vepre penale.