Kodet e bandës së ”Habilajve” tejet romantike: ”Më jep një puthje, vlla”

Banda e drejtuar nga Moisi Habilaj u përgjua nga policia italiane, e cila bëri një raport për gjykatën italiane, ku edhe përmendet emri i ish-ministrit Saimir Tahiri.

Të specializuar në trafikun e lëndëve narkotike dhe jo vetëm, Habilaj dhe bashkëpunëtorët e tij përdornin gjatë komunikimit me sms kode që janë fraza nga jeta e përditshme e një burri mesatar shqiptar, si përshembull: “Më jep një puthje vëlla”.

“Panorama” zbulon disa fragmente nga bisedat e regjistruara nga policia, kur Moisi Habilaj po koordinonte grupin e vet për transportimin e marijuanës dhe me vete kishin edhe armë. Si një menaxher i zoti, Moisi Habilaj mëson Sabaudin Çelajn dhe Giulianon se ç’duhet të bëjnë me armët, në rast se kontrollohen:

“Sabi, bjeri kallashnikovët. Po, thesin me kallashnikovë… Sabi nxirr vetëm dy kallashnikovë dhe lëre thesin aty ku është”, janë urdhrat e Moisi Habilajt, “[nëse vjen policia] Nxirri dhe fundosi”.

Më pas, ata instruktohen të fikin telefonët dhe t’u heqin baterinë atyre. Si kod për të konfirmuar se gjithçka po shkon siç duhet, përdorin këto sms: “Çdo 6-7 orë më ço një mesazh… “Ciao”, ose: “Më jep një puthje, vlla”, ose: “Shihemi së shpejti, ciao.”