Koronavirusi/Rekord i zi në Itali, 250 viktima në një ditë

250 persona kanë ndërruar jetë sot në Itali për shkak të COVID-19, sipas agjencisë vendore të mbrojtjes civile dhe numri total ka shkuar në 1266. Kjo rritje rekord ka zhvendosur epiqendrën e virusit në Europë. Pak më parë, Organizata Botërore e Shëndetësisë shpalli se Europa është tashmë epiqendra e pandemisë së coronavirus, ndërsa gjithnjë e më shumë vende po shpallim gjendjen e jashtëzakonshme. “Po raportohen më shumë raste tani në Europë sesa kur ishte kulmi i epidemisë në Kinë” , tha drejtori i përgjithshëm, Tedros Adhanom Ghebreyesus. Ai tha se deri tani kanë vdekur 5 mijë persona duke e cilësuar si një “moment tragjik” teksa i bëri thirrje qeverive që të implementojnë masat për mbajtjen e popullsisë në distancë në mënyrë që të frenohet përhapja.