Kush mungoi në homazhet për Lalon? Sidrit Bejleri u përvishet ”yjeve”

Sidriti kishte mllef dhe e pranoi. Pikërisht me këtë mllef u ul dhe shkruajti ca rreshta për “çapaçulët”, siç ai i quajti. Disa nga këngëtarët që e konsiderojnë veten “yje” munguan në homazhet dhe përcjelljen e kompozitorit Aleksandër Lalo. Sidriti nuk ishte surprizuar nga mungesa e tyre, se me siguri po vraponin për në ndonjë dasmë me apo pa ftesë. Edhe pse e priste këtë situatë, se mund ta ketë parë edhe në përcjelljen e ndonjë ikone tjetër, sërish i ziente gjaku. Kështu që iu përvesh me një status të gjatë të gjithë atyre që prentendojnë se bëjnë këngë, art dhe showbiz.

Mesazhi i plotë

Sot (dje) në drekë, tek po prisnim të përcillnim trupin e të ndjerit, mjeshtrit Aleksandër Lalo, vura re me keqardhje, por nuk u surprizova, se mungonin shumë “yje” të “showbizit” shqiptar. Nuk e kam për ata që e kishin të pamundur të vinin nga largësia dhe varet sa e njihnin. E kam për ata që rendin kush e kush të shkojë sa më shpejt në “dasmat vip”, ftuar e pa ftuar…

E kam për ata që pretendojnë se po bëjnë “muzikë” dhe “art” në këto kohë të “arta të muzikës”.

E kam për “çapaçulët” që nuk dinë dhe s’kanë për ta kuptuar kurrë sa vlerë dhe peshë ka për t’u bërë Arti i Vërtetë.

Mjeshtrat po ikin një nga një dhe vështirë të zëvendësohen e për më tepër Arti që na dhuruan. E di që kohët ndryshojnë, por të zezës nuk i them dot e bardhë.

E kam sërish me “çapaçulët”

Kush nuk respekton rrënjët dhe baballarët e vet nuk i mbetet gjë pas, e vërtetuar kjo. Si të hash “plehra” po “plehra” do prodhosh.

Kam mllef, po po, kam mllef sepse e di mirë çfarë arti na dhuruan Kujtim Laro e Aleksandër Lalo me shokë.

Se “çapaçulët” janë bërë të pasur dhe harrojnë se baballarët ikën të varfër, por pasurinë e lanë prapa.