Lufta në Alepo, Bushati: Bashkësia ndërkombëtare sodit tragjedinë

Ministri i Jashtëm, Ditmir Bushati ka reaguar në lidhje me luftën e përgjakur në Siri dhe sidomos atë çka po ndodh në qytetin e Alepos. Në një koment në facebook, kreu i dikasterit të Jashtëm në vendin tonë thotë se kjo luftë është rezultat i ganimeve të së shkuarës, ndërsa bashkësia ndërkombëtare, sipas tij po sodit këtë tragjedi njerëzore.

Bushati: Rënia e Halepit dhe shpopullimi gjakësor i orkestruar nga regjimini Bashar El Asad, janë një njollë më shumë në ndërgjegjen e rrënuar ndërkombëtare. Ndjenja e kompleksit prej gabimeve të së shkuarës, për fat të keq e ktheu “bashkësinë ndërkombëtare” në soditëse të një tragjedie njerëzore, e cila duhej parandaluar me çdo kusht. Një prej qendrave të trashëgimisë së njerëzimit, siç është Halepi, u shkatërrua tërësisht, u vra shpirtërisht dhe u kthye në fushë-varrezë të luftrave dhe interesave eksplozive gjeopolitike.

Bushati shprehet gjithashtu se Shqipëria mbështet çdo iniciativë të ndërmarrë nga vendet partnere për Sirinë, për të garantuar siguri për popullin sirian.

Bushati: Ne në Ballkan e kemi provuar çmimin e lartë të pasivitetit ndaj përdorimit të forcës brutale që imponojnë regjime barbare. Plagët e krimeve të shkaktuara gjatë luftërave të Ballkanit janë ende të pashëruara. Sikundër tentativa gjithnjë e më e dukshme për të aplikuar të ashtuquajturën politikë të “sferës së influencave”, e cila synon destabilizimin e rajonit dhe frenimin e perspektivës së qartë euro-atlantike. Qysh në nisje të këtij konflikti, Shqipëria ka mbështetur çdo iniciativë të ndërmarrë nga vendet partnere për Sirinë. Ne do të vijojmë të mbështesim përpjekjet për të garantuar sigurinë e popullsisë civile të bllokuar.