Shqipëria mund të bëhet pjesë e Bashkimit Europian edhe para vitit 2030, një objektiv që është përmendur shpesh edhe nga kryeministri Edi Rama. Këtë e la të kuptohet komisionerja europiane për Zgjerimin, Marta Kos, gjatë një bisede në Atlantic Council, ku foli për perspektivën europiane të vendeve të Ballkanit Perëndimor.
Ajo theksoi se dy vendet që po ecin më shpejt në këtë proces janë Mali i Zi dhe Shqipëria. Sipas saj, Mali i Zi ka mundësi reale të mbyllë kapitujt e negociatave deri në fund të këtij viti, çka do ta afronte ndjeshëm me anëtarësimin në Bashkimin Europian. Kos u shpreh se është e mundur që Mali i Zi, me rreth 650 mijë banorë, të bëhet anëtari i 28-të i BE-së.
Në të njëjtën linjë, ajo u ndal edhe te Shqipëria, duke nënvizuar se vendi ynë mund të anëtarësohet deri në vitin 2030, ose edhe më herët, nëse vijon me ritmin e reformave dhe përmbush kriteret e kërkuara nga Bashkimi Europian. Sipas saj, procesi i zgjerimit nuk përcaktohet nga data fikse, por nga meritat dhe rezultatet konkrete që arrijnë vendet kandidate.
E pyetur mbi propozimin e bërë së fundmi nga presidenti serb Aleksandar Vuçiç dhe kryeministri Edi Rama, për një formë anëtarësimi të pjesshëm në BE, ku vendet mund të përfshiheshin në Schengen apo tregun e përbashkët pa të drejtë vetoje, Kos u shpreh qartë kundër kësaj ideje.
Ajo deklaroi se nuk ekziston një anëtarësim “light”, duke sqaruar se një vend ose është anëtar i plotë dhe gëzon të gjitha të drejtat, ose nuk është anëtar dhe nuk i përfiton ato. Megjithatë, Kos tha se e kupton arsyetimin pas kësaj letre, si një alternativë në rast se procesi i zgjerimit has pengesa.
Në përfundim, komisionerja theksoi se misioni i saj është të ndihmojë vendet kandidate të bëhen anëtare të plota të Bashkimit Europian, sapo të përmbushin të gjitha reformat dhe standardet e kërkuara.