Mjekët që do punojnë në rrethe tani me superpaga

Qeveria tregohet dorëlëshuar, në një përpjekje për të dërguar mjekët specialist në zonat e largëta. Bonusi prej 1 milion lekësh të vjetra për mjekët specialistë që do të pranonin të punonin në spitalet rajonale i vendosur 4 vjet më parë joshi vetëm 6 mjekë. Ndaj tani një mjek specialist që do të pranojë të shkojë të ofrojë shërbim shëndetësor në zona të largëta nga vendbanimi i tij do të marrë në fund të muajit 200 deri në 250 mijë lekë në muaj në varësi të specialitetit.

Ministrja Shëndetësisë, Ogerta Manastirliu tha se qeveria ka rritur bonusin e mjekut për ta përafruar pagesën e tij mujore me atë të një mjeku të një tjetër vendi në BE.

“Ne kemi ndërmarrë iniciativën për rritjen e masës së bonusit që do të përfitojnë ata mjekë që do të pranojnë për të shkuar në ato zona ku ka nevojë për specialitete të caktuara. Nga 1 milionë që do të rritet nga 2 deri në 2.5 milionë nga koeficienti i specialitetit”, shprehet ministrja.

Ikja e mjekëve drejt vendeve të BE-së, kryesisht Gjermani si dhe ndërprerja e specializimeve 4 vjet më parë ka krijuar mungesa në sistemin shëndetësor, sidomos në spitale rajonale në zona të largëta ku mungojnë kardiologë, kirurgë, obstetër gjinekologë e të tjerë. Përveç kësaj, nxitjeje financiare, për një vit pritet të dalin dhe specializantet e parë.

Ndërkohë, për këdo mjek nga Qendra Spitalore Nënë Tereza që një ditë në muaj ofron shërbim në spitalet rajonale ka një pagesë shtesë 10 mijë lekë në muaj.