PD kërkoi përjashtim e Ndreut, maxhoranca e refuzon. Ruçi: Ka ndodhur në komision

Pak pas dorëzimit të kërkesës së Partisë Demokratike, që iu dorëzua Byrosë, për përjashtimin me 10 ditë nga seancat të deputetit Pjerin Ndreu, Kuvendi ka refuzuar kërkesën e opozitës.

Mediat mësojnë se në mbledhjen e Byrosë u refuzua kërkesa, ku PD pretendonte se socialisti kishte kërcënuar dhe bërë thirrje për ushtrim force ndaj deputetit Ervin Salianji.

Burimet pohuan se i pranishëm ne mbledhje ishte edhe Pjerin Ndreu. Kreu i Kuvendit, Gramoz Ruçi tha se; “Kjo mbledhje nuk munda ta shqyrtojë këtë rast sepse byroja nuk jep ndëshkime kur njerëzit shahen e fyhen ne komision. Ka parashikime veç për seancat plenare”.

NGJARJA

Dy deputetë socialistë, më 7 nëntor, e kanë kërcënuar sot deputetin e PD, Ervin Salianji, në komisionin e Sigurisë. Pyetja që Salianji i drejtoi ministres së Mbrojtjes, Olta Xhaçka, për buxhetin e ushtrisë, nuk i pëlqeu Xhaçkës, së cilës i kanë dalë në krah dy ish-oficerët e lartë të Policisë, Paulin Stërkaj dhe Pjerin Ndreu.

Ervin Salianji e pyeti ministren Xhaçka: “A ju duhet më shumë buxhet për të kontrolluar ish-repartet ushtarake, që përdoren për magazinim droge? A ju duhet më shumë buxhet për të vendosur në funksion radarët?!”

Por, përgjigjen pyetjes ia ka kthyer ndryshe, Paulin Stërkaj: Je bilbil mali! Se vetëm për të folur ke ardhur.

Kurse, Pjerin Ndreu, pa mikrofon, iu kthye Salianjit: Mos i provoke të gjithë se do të hash dajak! Ti do rrahur!

Paulin Stërkaj ka vazhduar, duke i kujtuar Salianjit:… Unë bëj mundje, boks edhe karate. Mos më bëj mua presion!

Pjerin Ndreu nga ana tjetër iu ka kthyer deputetit demokrat: Rri more urtë se je bërë provokator i keq! Rri more urtë, nuk e shikon çfarë është bërë në të kaluarën?!

Salianji ia ka pritur: Nuk pyes dhe s’kam frikë nga asnjë bandit!