“Po të mos ishe kushërirë e ministrit, do bëheshe zëvendëse e tij”?

Në Bundestagun gjerman në Berlin, më 3 mars u mbajt një konferencë për perspektivën europiane të Shqipërisë e Maqedonisë së Veriut. Në këtë konferencë vendi ynë përfaqësohej nga Odeta Barbullushi. Ajo prezantoi arritjet e Reformës në Drejtësi me fokus te Vetting-u, si një argument kryesor për hapjen e negociatave të anëtarësimit në BE.

Raundi i pyetjeve për panelin solli një ”surprizë” të pakëndshme për Barbullushin, pasi një i pranishëm tha se ka probleme në qeveri me emërime të pamerituara dhe e pyeti nëse ajo do të ishte emëruar zv.ministre, nëse nuk do të kishte qenë kushërirë e ministrit të Jashtëm të asaj kohe. Barbullushi nuk ju përgjigj asaj pyetje por shpjegoi Reformën Zgjedhore në proces.

Hans-Joachim Falenski, këshilltar i grupit parlamentar CDU/CSU, i cili javën e shkuar u dekorua Kalorës i Urdhërit të Skëndërbeut nga Presidenti Meta ishte gjithashtu i pranishëm. Falenski theksoi se deputetët e CDU po punojnë me kolegët e tyre holandezë, që ata të mos vënë veto për hapjen e negociatave me Shqipërinë.

”Ne sugjerojmë që kolegët holandezë të mos votojnë kundra negociatave por, sipas shembullit të Bundestagut, të vendosin po të duan një kusht të dhjetë apo të njëmbëdhjetë. ( 0:56:36 – 0:57:52) Raporti i Komisionit Europian që u publikua dje nuk e përmend fare këtë problem dhe kjo nuk është pozitive”.