Aktivisti Edison Lika deklaroi gjatë fjalës së tij para Kryeministrisë se protesta qytetare ka hyrë në një fazë të rëndësishme dhe se pjesëmarrësit vijojnë të jenë të vendosur për të qëndruar në shesh deri në përmbushjen e kërkesave të tyre.
Duke iu referuar zhvillimeve të pritshme në shtator, Lika paralajmëroi se protestuesit nuk do ta konsiderojnë të mjaftueshme një ndryshim të pjesshëm në qeveri. Sipas tij, edhe nëse kryeministri do të largonte nga detyra Belinda Ballukun, protesta do të vazhdonte deri në dorëheqjen e të gjithë kabinetit qeveritar.
Sipas Likës, kërkesa kryesore e protestës mbetet dorëheqja e kryeministrit Edi Rama. Ai tha se çdo ditë e re e protestës është, sipas tij, një ditë më pak qeverisje për pushtetin dhe paralajmëroi se procesi drejt largimit të Ramës ka nisur.
Aktivisti kundërshtoi gjithashtu pretendimet se protesta kontrollohet nga forca apo figura politike. Ai theksoi se qytetarët janë mbledhur në shesh kundër të gjithë atyre që sipas tij kanë vepruar në dëm të vendit.