Pse nuk errësohet plotësisht në Gjermani? Fenomeni që ndriçon netët e verës

Teksa afrohet vera dhe dita më e gjatë e vitit, netët në Gjermani po bëhen gjithnjë e më të shkurtra dhe më të ndritshme. Në disa zona të vendit, sidomos në veri, errësira e plotë pothuajse nuk bie fare gjatë kësaj periudhe.

Sipas Shërbimi Meteorologjik Gjerman (DWD), fenomeni lidhet me zgjatjen e muzgut, i cili ndahet në tre faza kryesore.

Muzgu civil nis menjëherë pas perëndimit të diellit dhe zgjat deri në momentin kur shfaqen yjet e parë. Ai përfundon kur dielli ndodhet 6 gradë poshtë horizontit.

Më pas vjen muzgu detar, gjatë të cilit mund të dallohen yje me shkëlqim mesatar. Kjo fazë mbaron kur dielli zbret 12 gradë nën horizont.

Vetëm kur dielli arrin 18 gradë poshtë horizontit nis muzgu astronomik, moment që konsiderohet fillimi i natës së vërtetë.

Rreth solsticit të verës, rruga e diellit bëhet më e sheshtë në raport me horizontin. Kjo bën që ai të perëndojë më ngadalë dhe të qëndrojë më gjatë pranë horizontit, duke zgjatur ndjeshëm muzgut.

Në Gjermaninë veriore dhe në disa pjesë të qendrës së vendit, muzgu astronomik nuk përfundon plotësisht para lindjes së diellit të ditës tjetër. Ky fenomen njihet si “muzgu i mesnatës” dhe është tipik për zonat në veri të paralelit të 49-të.

Më në veri të Evropës, pranë paralelit të 61-të, ndodh edhe fenomeni i njohur si “netët e bardha”, ku errësira e plotë mungon pothuajse tërësisht. Shën Petersburg konsiderohet një nga shembujt më të njohur të këtij fenomeni.

Ekspertët theksojnë se drita e zgjatur ndikon jo vetëm në vëzhgimin e qiellit të natës, por edhe në ritmet biologjike të njerëzve dhe kafshëve. Gjatë kësaj periudhe, bëhet më e vështirë të dallohen galaktikat dhe Rruga e Qumështit, ndërsa modelet e gjumit përshtaten me kohëzgjatjen më të madhe të dritës natyrore.

Pas solsticit të verës më 21 qershor, netët do të fillojnë gradualisht të zgjaten dhe errësira do të rikthehet në mënyrë më të plotë.