QSUT, hapet dhoma “No Pain” për fëmijët me sëmundje të rënda

Në Qendrën Spitalore Universitare “Nënë Tereza” është hedhur një hap i rëndësishëm drejt përmirësimit të kujdesit shëndetësor për fëmijët që përballen me sëmundje të rënda.

Në shërbimin e Onkohematologjisë Pediatrike është vënë në funksion dhoma “No Pain”, e cila synon të reduktojë ndjeshëm dhimbjen e fëmijëve gjatë procedurave mjekësore.

Drejtoresha e Përgjithshme e QSUNT-së, Anxhela Paparizo u shpreh se ky investim është bërë i mundur falë donacionit të Fondacionit Heydar Aliyev dhe Leyla Aliyeva, me mbështetjen e Ambasadës së Azerbajxhanit në Shqipëri. Pajisja me teknologjinë më të fundit krijon kushte bashkëkohore për trajtimin e pacientëve të vegjël, duke ndikuar drejtpërdrejt në cilësinë e shërbimit.

Dhoma “No Pain” është projektuar për të ofruar një ambient të përshtatshëm dhe miqësor për fëmijët, ku procedurat e nevojshme mjekësore mund të kryhen në mënyrë më të qetë dhe pa trauma. Përmes përdorimit të teknikave dhe pajisjeve moderne, ekipi mjekësor synon të minimizojë dhimbjen dhe ankthin që shpesh shoqërojnë trajtimet e tilla.

Ky zhvillim përbën një hap të rëndësishëm në humanizimin e shërbimit shëndetësor pediatrik në vend, duke vendosur në qendër mirëqenien e fëmijëve.

Kjo hapësirë moderne i mundëson ekipit mjekësor të realizojë procedurat e nevojshme në kushte komode dhe sipas standardeve bashkëkohore, duke garantuar më pak dhimbje, më pak stres dhe më pak trauma për pacientët tanë të vegjël.