Rrëfimi i të moshuarve: Grabitësit i ranë ziles, ishin me armë…

Një çift i moshuarish në Vlorë u grabit gjatë natës nga tre persona të paidentifikuar. Ka qenë vetë Resmi Osmënaj, ai që ka bërë denoncimin në polici. 81-vjeçari tha se në shtëpinë e tij në lagjen “1 Maji”, ku ndodhej vetëm me bashkëshorten, kanë hyrë tre shtetas ende të paidentifikuar dhe nën kërcënimin e armës së zjarrit kanë marrë në banesë disa sende të ndryshme si varëse, dy aparate celular dhe një shumë vlerash monetare.

Osmënaj, një i moshuar i sëmurë me paralizë, ka rrëfyer terrorin e përjetuar nga grabitësit në banesë gjatë natës. Përpara efektivëve, ai ka theksuar se hajdutët ishin të armatosur dhe i kishin ranë ziles së shtëpisë dhe momentin kur gruaja e tij e ka hapur derën ata e kanë goditur.

“Mbrëmë natën i ranë ziles së derës. Unë i thash gruas mos e hap derën, se në fakt 2 pleq ishim, djemtë i kam në Itali. Ngrihet gruaja hap derën. Sapo hap derën ishin dy veta aty, njëri me automatik dhe njëri me levë të gjatë dhe i ra në fytyrë gruas. Ajo ulërti dhe ra përtokë. U ngrita unë, siç isha i sëmurë, erdhi njëri më shtyu e më hodhi prap në krevat. Bënë kontroll, nuk lanë vend pa kontrolluar, i hodhën të gjitha të tokë.”

Resmiu u shpreh se grabitësit ishin me maska, 2 i torturonin brenda ndërsa autorët e tjerë ishin jashtë dhe se kishin ardhur vetëm për të marrë lekë.

”Na thanë kemi ardhur vetëm për lekë, sduam gjë. Kishte rreth 200 mijë lekë të pensionit dhe na i morën. I hoqën varësen gruas edhe një unazë. 2 persona ishin që na torturonin. Ndërsa jashtë ishte njëri që na ruante. Ishin 3 ose 4 grabitës. Më morën telefonat dhe nuk kisha me çfarë të merrja në telefon policinë. Kisha një telefon të vogël që e vura në karikim për ti lajmëruar”.