Rritet bilanci i COVID-19. Në Shkodër shënohet viktima e radhës. Ministria: Vdiq nga hemorragjia cerebrale

Një tjetër viktimë nga Covid-19 është shënuar në Shkodër.  Mësohet se shtetasi me inicialet M.S, i cili ishte i shtruar në repartin e reaminacionit në Spitalin e Shkodrës ka ndërruar jetë mëngjesin e sotëm. Viktima ndërroi jetë në orën 04 e 30 minuta të mëngjesit të sotëm.

Pacienti ishte pozitiv me Covid-19. Mostra e pacientit për të bërë analizat ndaj Covid-19 është marrë mëngjesin e djeshëm, ku ka rezultuar pozitiv me Covid-19.

Ndërkohë sa i takon pacientëve të tjerë në Shkodër, mësohet se dy prej të shtruarve janë dërguar në Tiranë për mjekim më të specializuar, pasi rezultojnë pozitivë, ndërkohë që në Shkoder ndodhet vetëm 1 prekur me Covid 19 në repartin e dializës.
Ministria e Shëndetësisë ka reaguar pas lajmit se një person në Shkodër ishte viktima e radhës e koronavirusit.
Në një sqarim zyrtar, ministria njofton se shkaku i vdekjes së pacientit 59-vjeçar ishte hemorragjia cerebrale.
“Nuk ka viktimë si pasojë e COVID-19 në Shkodër, shkaku i vdekjes së pacientit hemorragji cerebrale”, thekson në sqarim ministria.

“59-vjeçari, me inicialet M.S., nga Puka, ndodhej në gjendje kome në spitalin rajonal të Shkodrës, ka ndërruar jetë në spital, si pasojë e hemorragjisë cerebrale (aksident cerebral vascular) dhe jo si pasojë e COVID19, nga i cili ka rezultuar bartës ditën e djeshme, por pa simptoma të COVID19.

Sipas epidemiologëve dhe përfaqësuesve të Institutit të Shëndetit Publik që po kryejnë hetimin epidemiologjik në terren, dyshohet se ky rast është i lidhur me rastin e infermieres, e cila, sipas hetimit epidemiologjik, është infektuar në komunitet.

Nga rezultatet e testimeve të kryera në spitalin e Shkodrës, në 10 pacientë të shtruar që kanë qenë në kontakt me infermieren e infektuar, kanë rezultuar 4 pacientë të prekur, në gjendje të rëndë shëndetësore për shkak të patologjive për të cilat po trajtohen, por pa simptoma përsa i takon COVID19.

Njëri prej tyre, 59-vjeçari me inicialet M.S. ka ndërruar jetë, ndërsa tre pacientë të tjerë që janë bartës të COVID19 janë transferuar gjatë ditës së sotme në dy spitalet COVID”, njofton ministria.