Shpërthim i madh në uzinën e Ballshit, një i vdekur dhe 7 të plagosur

Aktualitet E Martë, 4 Maj 2021 19:49

Shpërthimi i fuqishëm që ndodhi mbrëmë në Rafinerinë e Përpunimit të Naftës në Ballsh shkaktoi vdekjen e një punonjësi të Rafinerisë së Përpunimit të Naftës në Ballsh dhe plagosjen e 7 të tjerëve.

Viktima u identifikua si Shkëlqim Muça, 40 vjeç nga Ballshi, i cili ishte më afër zonës ku shpërthyen flakët e para

Ndërkohë edhe një tjetër person është në gjendje kritike për jetën, si pasojë e plagëve të shumta. Ngjarja e rëndë ndodhi rreth orës 21:00, në Repartin nr.3, në seksionin 92. Sipas Policisë, në këtë repart ku po punonin 15 punonjës, shpërtheu një valvul e pompës së hidrogjenit. Mësohet se prej gati 5 ditësh në repartin e njohur si ai i hidropastrimit ishte prishur një kompresor, i cili nuk ishte riparuar.

Për këtë, punonjësit kanë bllokuar valvulën, duke vepruar në këtë mënyrë në pritje të riparimit të defektit. Kjo valvul shërbente në procesin e fundit të filtrimit të naftës, shumë pranë repartit të reaktorëve në uzinën e Ballshit.

Si pasojë e faktit që valvula nuk bënte shkarkimin e duhur, ajo është bllokuar dhe ka shpërthyer mbrëmjen e djeshme, duke shkaktuar dhe zjarrin masiv. Shpërthimi i provokuar nga shkarkimi i valvulës dhe më pas kontakti me lëndën djegëse ka tronditur të gjithë banorët e Ballshit, të cilët dhanë alarmin të parët.

Në ambientet e repartit ku shpërtheu zjarri janë plagosur 7 punonjës, të cilët ishin më afër vatrës. Njëri prej tyre ndërroi jetë, pikërisht Shkëlqim Muça, 40 vjeç, nga Ballshi, ndërsa të tjerët janë dërguar në spitalin e qytetit e më pas në Fier e në Tiranë për mjekim të specializuar.

Në momentet e zjarrit, në të gjithë uzinën ishin në turn 300 punonjës, të cilët janë larguar me shpejtësi nga ambientet e punës. Zjarrfikëse nga Ballshi, Fieri, Tirana e Vlora shkuan në uzinë për të bërë të mundur izolimin e flakëve. Rreziku më i madh qëndronte te reparti ngjitur, ai i reaktorëve, pasi nëse flakët depërtonin aty, atëherë mund të ndodhte një katastrofë e vërtetë.