Tahiri inspekton rrëshqitjen e dheut në Kombinat

Ministri i Brendshëm, Saimir Tahiri inspektoi punimet e emergjencave civile në zonën ku pati rrëshqitje dheu që vendosi disa banesa në rrezik në zonën e Kombinatit në Tiranë.

“Garantoj mbi të gjitha banorët këtu, që nuk janë vetëm dhe do marrim masa për të dhënë zgjidhje sa më shpejt, pa toleruar asnjë neglizhencë që mund të sillte dhe pasoja”, deklaroi Tahiri.

Ministri sqaroi se fillimisht po punohet për të shmangur rreziqet dhe më pas do të vijohet me fazën e rehabilitimit.

“Na duhet të rehabilitojmë zonën në mënyrë që rreziku i menjëhershëm të shmanget nga shtëpitë e banorëve dhe më pas duhet parë konkretisht çfarë lloj investimi duhet për të mos lejuar përsëritjen në të ardhmen dhe këtë mund ta thonë ekspertët”, u shpreh ai.