Zgjedhjet, BE thirrje qeverisë për zbatimin e rekomandimeve të OSBE-ODIHR

Ambasadori i Bashkimit Europian, Luigi Soreca, përshëndeti udhëzimet e miratuara sot nga KQZ lidhur me financimet e partive.

Në një postim në tëitter, Soreca shkruan se udhëzimet e miratuara sot nga Komisioni Qendror i Zgjedhjeve krijojnë një ndjekje proaktive të rekomandimeve të OSBE-ODIHR për financimin e partive politike.

Për Sorecën, miratimi i këtyre akteve nënligjore paraqet një hap të parë të mirë në drejtimin e duhur.

Soreca shton se këto udhëzime duhet të ndiqen nga një përpjekje më e gjerë nga të gjitha palët politike për të siguruar zbatimin e rekomandimeve të tjera të OSBE / ODIHR, që në disa raste nuk kërkojnë amendim të kodit zgjedhor dhe mund të çohen përpara nga qeveria.

Ekspertët kontabël dhe të auditit do të monitorojnë në terren shpenzimet e partive politike dhe të kandidatëve të tyre për fushatën zgjedhore të 30 qershorit dhe do ti krahasojnë të dhënat me faturat e blerjes.

Ka qenë ky një ndër vendimet që është miratur në Komisionin Qendror të Zgjedhjeve, për të rritur monitorimin dhe kontrollin mbi financimet dhe shpenzimet në fushatë.