Ku është shteti?! Frika e policisë nga kritika nuk e shuan detyrimin për të mbrojtur rendin publik

Nëse zjarret dhe shkatërrimet që po denoncohen sot e sonte në Tiranë po vazhdojnë pa u ndalur, institucionet duhet të japin llogari menjëherë. Qytetarët nuk mund të lihen përballë dhunës që po manifestojnë protestuesit që djegin, dhunojnë institucione shtetrore, biznese private, etj, por shteti duhet të bëhet i gjallë.

Ku është shteti? Ku janë drejtuesit që paguhen për të garantuar rendin dhe sigurinë? Detyra e tyre provohet pikërisht kur qyteti rrezikohet. Pas çdo prone të dëmtuar janë paratë e qytetarëve; pas çdo biznesi të cenuar janë puna dhe të ardhurat e një familjeje.

Protesta është e drejtë demokratike. Kryeministri dhe mazhoranca duhet të reagojnë për problemet që ata kërkojnë, por jo shkaterrim e zjarr.

Djegia dhe shkatërrimi janë veprime për të cilat autorët duhet të përgjigjen. Askush nuk fiton imunitet duke hyrë në një turmë. Askush nuk ka të drejtë ta kthejë pakënaqësinë e vet në frikë për mijëra njerëz të tjerë.

Nëse policia heziton nga frika e akuzave, drejtuesit e saj duhet ta kuptojnë se frika nga kritika nuk e shuan detyrimin për të mbrojtur qytetarët. Çdo ndërhyrje duhet të jetë e ligjshme, e dokumentuar dhe proporcionale. Por pasiviteti përballë dhunës është dështim që kërkon përgjegjësi.

Policia duhet të ndalojë autorët e shkatërrimeve, të sigurojë provat dhe të mbrojë njerëzit, pronën dhe protestuesit paqësorë. Organizatorët duhet të dënojnë qartë dhunën dhe të kërkojnë ndalimin e saj. Heshtja dhe justifikimet e bëjnë edhe më të rëndë gjendjen.

Tirana nuk është pronë e një partie dhe as plaçkë për zemërimin e kujtdo. Është qyteti ku njerëzit jetojnë, punojnë dhe rrisin fëmijët.

Kush shkatërron qytetin duhet të përballet me ligjin. Kush e lë qytetin pa mbrojtje duhet të japë llogari. Shteti nuk mund të jetë i pranishëm vetëm kur mbledh taksat dhe të mungojë kur qytetarët kanë nevojë për të!