Zjarr në Cërrik, flakët përfshijnë ullishten dhe afrohen pranë banesave

Vatra të shumta zjarri kanë shoqëruar këtë sezon veror në bashkinë e Cërrikut, duke mbajtur në gatishmëri të vazhdueshme shërbimet zjarrfikëse.

Një tjetër zjarr u shfaq mesditën e kësaj të diele në Lagjen nr. 1 të qytetit, ku flakët përfshinë një parcelë me ullinj me sipërfaqe të konsiderueshme.

Zjarri u raportua rreth orës 12:45 dhe, për shkak të përmasave të tij si edhe afërsisë me zonat e banuara, në vendngjarje u angazhuan disa mjete dhe efektivë të shërbimit zjarrfikës të Bashkisë Cërrik.

Flakët kanë përfshirë ullishten në zonën periferike të qytetit, ndërsa pranë saj ndodhen edhe banesa, duke rritur rrezikun e përhapjes së zjarrit. Temperaturat e larta dhe kushtet atmosferike kanë favorizuar avancimin e flakëve.

Zjarrfikësit vijojnë punën për izolimin e vatrës dhe monitorimin e zonës, me qëllim parandalimin e përhapjes së zjarrit drejt banesave dhe sipërfaqeve të tjera me bimësi.