Armëpushimi me Teheranin, Trump: Një ditë e madhe, Amerika do të ndihmojë me rindërtimin e Iranit

Disa orë pasi paralajmëroi se një qytetërim i tërë do të vdesë, presidenti i Amerikës, Donald Trump përdori mediat sociale për të festuar një marrëveshje armëpushimi dyjavore, duke e quajtur atë një ditë të madhe për paqen botërore.

”Irani dëshiron që kjo të ndodhë, kanë duruar mjaft! Po kështu, të gjithë të tjerët kanë duruar! Shtetet e Bashkuara të Amerikës do të ndihmojnë me rritjen e trafikut në Ngushticën e Hormuzit”, shkroi Trump në Truth Social .

”Do të ketë shumë veprime pozitive! Do të fitohen shumë para. Irani mund të fillojë procesin e rindërtimit”, vazhdoi presidenti. ”Ne do të ngarkohemi me furnizime të të gjitha llojeve dhe thjesht do të ‘presim’ për t’u siguruar që gjithçka të shkojë mirë. Jam i bindur se do të shkojë mirë”.

Presidenti e përshkroi marrëveshjen si një “armëpushim të dyanshëm”, duke thënë se SHBA-të tashmë i kanë përmbushur ose tejkaluar objektivat e tyre ushtarake dhe janë “shumë larg” në arritjen e një marrëveshjeje afatgjatë paqeje me Iranin dhe stabilitet më të gjerë në Lindjen e Mesme.