Arrestime në Francë! Kërcënime të rreme për sulme me bomba

Pas një vale të kërcënimeve me bomba, të cilat kanë nxitur evakuime, mësohet se të paktën 18 persona janë arrestuar në Francë. Pallati i Versajës, Luvri, si dhe shkolla, aeroporte dhe spitale, janë shënjestruar.

Autoritetet kanë bërë me dije se mbrapa këtyre akteve kanë qenë kryesisht të miturit. Këto kërcënime vijnë në kohën e rritjes së tensioneve në Francë, pasi një mësues është goditur me thikë për vdekje nga një xhihadist i dyshuar, në një shkollë në qytetin Arras.

Kërcënimet me bomba kanë rezultuar me evakuim të Pallatit të Versajës katër herë gjatë javës, derisa Muzeu i Luvrit në Paris është detyruar t’i evakuojë mijëra vizitorë të shtunën.

Një numër i aeroporteve rajonale janë evakuuar të mërkurën, përfshirë Lille, Nantes, Nice dhe Tuluz, të enjten.

Franca e ka rritur alarmin kundër terrorizmit në nivelin më të lartë, javën e kaluar, pas vrasjes së mësuesit 57-vjeçar.

I dyshuari, ish-nxënës, është shtetas rus me origjinë çeçene.

Kërcënimet për bomba janë bërë me telefona, përmes emaileve, përmes një faqeje online për t’i kontaktuar direkt zyrtarët policorë, apo duke i kontaktuar ata në rrjetet sociale.

Ministri francez i Drejtësisë, Eric Dupond-Moretti, ka paralajmëruar ata që i ka quajtur “shakaxhinj të vegjël” se dhe do të “identifikohen dhe ndëshkohen”.

Të gjithë ata që bëjnë thirrje për kërcënime të rreme me bomba, mund të përballen me tri vjet burgim dhe gjobë prej 45.000 eurove.

/CNA