Bie papunësia në SHBA – Rekord 49 vjeçar në 3.7%, por punësimi në ngadalësim

Hapi i punësimit në Shtetet e Bashkuara të Amerikës është ngadalësuar por kjo nuk ka penguar që papunësia të bjerë pranë nivelit më të ulët të 49 viteve të fundit, në vetëm 3.7%. Të dhënat janë zyrtare dhe i referohen muajit Shtator.

Departamenti i Punës flet kështu për 134 mijë vende të reja pune gjatë muajit në sektorin jo-bujqësor. Kjo është norma më e ulët në një vit, por që është rrjedhojë e një tregu pune thuajse në kapacitet të plotë.

Ekonomia amerikane nuk ka më nevojë të krijojë aq shumë vende pune. Të dhënat e Korrikut dhe Gushtit ndërkohë janë rishikuar ndjeshëm në territor pozitiv.

Ekonomia duhet të krijojë 120 mijë vende të reja pune në muaj në mënyrë që të mbajë ritmin e rritjes.

Ngadalësimi i hapit të punësimit, sipas ekspertëve, mund të jetë rrjedhojë e uraganit Florence.

Të dhënat nuk e ndalin dot Rezervën Federale nga rritja e mëtejshme e normave të interesit. Pritet që institucioni të ndërhyjë të paktën edhe një herë gjatë këtij viti në kahun shtrëngues të politikave monetare.