”Isha në vagonin e vdekjes”/ Studentja greke: Shoqja ime kishte një parandjenjë

Të mbijetuarit nga përplasja e dy trenave në Larisa të Greqisë, po tregojnë momentet e tmerrit që përjetuan. Studentja Agni Titeli, kishte një biletë në vagonin e tretë të trenit, por ishte shoqja e saj e cila i kërkoi të udhëtonin së bashku në vagonin e fundit, pasi kishte një parandjenjë të keqe.

“Zakonisht ulem përpara dhe për herë të parë u ula në fund. Është fati që bëri të shpëtonin të gjithë të mbijetuarit, nuk e shpjegoj dot ndryshe”, tha vajza. Ajo rrëfen se pas përplasjes së fuqishme, mundi të dilte nga treni dhe pa që vagonat e parë kishin shpërthyer në flakë.

“Nuk mund ta imagjinoj se çfarë kanë kaluar ato që ishin në vagonin e parë. Më në fund treni ndaloi, panik, tym, edhe në vagonin e shtatë kishte tym, mbante erë djegie dhe të gjithë na bërtisnin të dilnim”, shton ajo.

E reja shtoi se nga traumat që kishte pësuar ka frikë të rrijë vetëm dhe nuk e di nëse do të mund të udhëtojë më me tren. ”Kur dola isha në një tunel, dera u hap dhe dola nga paniku, na trembën sepse na tregonin për rrezikun e një shpërthimi. Unë dal jashtë, e nxirë, nuk e kisha idenë se çfarë kishte ndodhur, thjesht menduam se treni kishte dalë nga shinat. Nuk mund t’i përshkruaj britmat e njerëzve, bërtisnin se po digjen, shkova atje pashë shumë zjarr, na thoshin të largoheshim dhe u largova nga ana tjetër. Mendova se mund të vdisja, mora babin, pata sulme paniku”,-tha ajo.