Papa: Mos i diskriminoni të divorcuarit dhe homoseksualët

Papa Françesku publikoi udhëzimet e reja përsa i përket jetës në familje dhe u shpreh se, Kisha duhet të jetë më e hapur ndaj realiteteve moderne.“Amoris Letisia” apo “Gëzimi i Dashurisë”, quhet Nxitja Apostolike e nënshkruar nga Papa Françesku më 19 Mars.“Thelbi i saj është mëshira dhe integrimi”,- tha Ati i Shenjtë.

Dokumenti prej 200 faqesh rendit pikëpamjet e Papës mbi jetën familjare, martesën, divorcin dhe rritjen e fëmijëve. Pikërisht divorci ishte risia më e madhe në Nxitjen Apostolike të Papës.

“Askush nuk mund të jetë i dënuar i përjetshëm, sepse kjo nuk është logjika e Ungjillit! – tha Papa Françesku duke iu referuar të divorcuarve.

Ai u bëri thirrje priftërinjve në mbarë botën të pranojnë të divorcuarit, njerëzit që jetojnë jashtë rregullave të përcaktuara nga Kisha, si edhe të mos diskriminojnë homoseksualët.

Ati i Shenjtë tha gjithashtu se priftërinjtë duhet të jenë më të kujdësshëm ndaj “familjeve të lënduara”.