Presidentja dhe kryeministri grek bëjnë vaksinën anti Covid, përse Mitsotakis qëndroi 15 minuta në dhomë pritjeje

Presidentja e Greqisë, Katerina Sakellaropoulou dhe kryeministri Kyriakos Mitsotakis janë vaksinuar ditën e sotme në spitalin “Evangelismos”. Presidentja u mirëprit nga Ministri i Shëndetësisë Vassilis Kikilias dhe më pas u ndoq procedura e përcaktuar nga protokolli.

Kryeministri u mirëprit nga Sekretari i Kujdesit Parësor të Ministrisë së Shëndetësisë, Marios Themistokleous, ndërsa ai shoqërohej nga Profesori Sotiris Tsiodras.

Mitsotakis, pasi ndoqi procedurën e përcaktuar në protokoll, duke plotësuar dokumentin përkatës, u vaksinua dhe më pas shkoi në një dhomë pritjeje, ku do të qëndroi për 15 minuta, siç parashikohet në protokoll, për arsye sigurie.

“Kjo është një ditë e rëndësishme për të gjithë ne, sot ne mund të jemi optimistë,” tha ai, ndërsa asnjëri prej tyre nuk shfaqi komplikacione.