Presidentja e Greqisë, gruaja që shembi çdo barrierë

Presidentja e re e Greqisë, ka lindur më 30 maj 1956. Katerina Sakellaropoulou u votua nga parlamenti grek si presidentja e tetë e republikës së tretë helene dhe e 13 në total. Ajo do të marrë postin më 13 mars dhe do të jetë e para grua që do ta mbajë këtë pozicion në Greqi.

Katerina Sakellaropoulou ka lindur në Selanik. Vajza e një gjykatësi të Gjykatës së Lartë, ajo ka studiuar drejtësi në universitetin e Athinës dhe ka kompletuar studimet pasuniversitare në ligj publik në Universitetin e Sorbonës, në Paris. Në mes të viteve 80 ajo u pranua në Këshillin e Shtetit dhe u promovua në këshilltare në vitin 2000. Në tetor 2015 ajo u zgjodh Zv/Presidente e Këshillit të Shtetit dhe në tetor 2018, në mënyrë unanime, u zgjodh Presidente e këtij Këshilli. Dhe kjo ishte një arritje e madhe pasi ajo u bë e para grua që merr kryesimin e gjykatës më të lartë të vendit, arritje kjo që do të lihej sërish prapa tani me uljen e saj në karrigen e presidentit.

Ajo do të zërë tani vendin e Prokopis Pavlopulos, mandati pesë vjeçar i të cilit përfundon në mars. Edhe pse presidenti është shefi i shtetit grek dhe komandant i forcave të armatosura, posti është kryesisht ceremonial. Presidentët grekë konfirmojnë qeveritë. Ligjërisht dhe teknikisht kanë fuqinë të shpallin luftë por vetëm në bashkëveprim me qeverinë.

E mbështetur nga majtistët e Syrizës dhe Partitë Socialiste, Katerina Sakellaropoulou mundi të sigurojë një nga rezultatet më të mira të votimit në historinë e parlamentit grek. Ajo ka thyer kështu traditat jo vetëm sepse është femër por edhe pse nuk është anëtare e asnjë partie politike.