Rekordi, 171.000 emigrantë kanë mbërritur këtë vit në Itali

171.000 emigrantë kanë mbërritur në brigjet e Italisë jugore që nga fillimi i vitit, duke vendosur kështu një rekord që prej nisjes së krizës. Gjithashtu, një tjetër rekord negativ është numri i refugjatëve që kanë humbur jetën që aktualisht është ndalur në shifrën 4.690. Shumica e emigrantëve që kanë mbërritur në Italinë jugore kanë ardhur kryesisht nga Nigeria dhe Eritrea.

Që nga fillimi i vitit e deri më tani, më shumë se 171.000 emigrantë kanë mbërritur në brigjet e Italisë jugore, duke vendosur kështu një tjetër rekord.

Deri më tani, viti që kishte regjistruar numrin më të lartë të azil-kërkuesve që kishin arritur në brigjet e gadishullit Apenin ishte viti 2014, kur totali i refugjatëve ishte 170.100.

Në kushtet kur viti ende nuk ka përfunduar, zyrtarët kanë deklaruar se rekordi do të tejkalohet edhe më shumë.

Organizata e Kombeve të Bashkuara tregon gjithashtu me shqetësim numrin e emigrantëve që janë ndarë nga jeta, në përpjekje për të lundruar drejt Italisë.

Në vitin 2016, në ujrat e Detit Mesdhe ka patur në total 4.690 viktima, një tjetër rekord negative.

Ekspertët paralajmërojnë se kjo shifër mund të mos jetë e saktë pasi shumë incidente tragjike që mund të kenë ndodhur mund të mos jenë zbuluar nga rojat bregdetare.

Shumica e emigrantëve që mbërrijnë në brigjet e Italisë, kanë si synim që të udhëtojnë më tej drejt vendeve të Europës perëndimore.

Megjithatë, aktualisht në territorin italian po strehohen 176.000 azil-kërkues.

Shumica dërrmuese e emigrantëve vijnë nga vende afrikane. Në bazë të shifrave të komunikuara nga Ministria e Brendshme, vendi nga ku kanë ardhur më së shumti refugjatët është Nigeria me 36.000 azil-kërkues, e ndjekur nga Eritrea me 20.000 të tillë.

Ndërkohë, destinacionet e tyre përfundimtare më të preferuara kanë qënë Gjermania dhe Suedia.