Rikthehet sëmundja e lopës së çmendur, ja ku u regjistrua rasti

Pak kohë më parë bëri bujë lajmi dhe alarmi për të ashtuquajturën sëmundja e lopës së çmendur.

Por duket se ky rrezik është rikthyer, teksa një lopë ka rezultuar pozitive ndaj kësaj sëmundjeje.

Rasti është konstatuar në Florida të Shteteve të Bashkuara.

Njoftimin e bëri të mërkurën (29 gusht) Departamenti Amerikan i Bujqësisë.

Kafsha i përkiste një ferme në Florida dhe synohej që të therej e shitej për konsum. Nëse njerëzit konsumojnë mishin e një lope të prekur nga kjo sëmundje, ekziston rreziku i zhvillimit të sëmundjes së prionit (një çrregullim i trurit që mund të vrasë njerëzit).

Kjo është hera e gjashtë që sëmundja është zbuluar në ShBA gjatë 15 viteve të fundit. Departamenti i Bujqësisë siguron se lopa e infektuar është zhdukur para se t’ia ngjisë sëmundjen kafshëve të tjera.