Nga Eduard Zaloshnja-
Në zgjedhjet parlamentare të qershorit 2017, vetëm 32 mijë vota (1.9%) dolën të pavlefshme, sepse fleta e votimit ishte e thjeshtë. Në zgjedhjet parlamentare të prillit 2021, plot 83 mijë vota rezultuan të pavlefshme. Domethënë, 5% e votuesve u ngatërruan në plotësimin e fletëvotimeve si fjalëkryqe numerike. Dhe kështu, votat u shkuan dëm…
Kësaj here, fleta e votimit është vërtet e madhe sa një fletë gazete, por më e thjeshtë se fjalëkryqi numerik i prillit 2021. Në fletën e votimit më 11 maj, votuesit do të shohin 12 kolona emrash kandidatësh (jo numrash), nga një kolonë për secilin subjekt elektoral. Kështu që përqindja e votave të pavlefshme pritet të jetë më pak se 5-përqindëshi i 2021-shit, por sidoqoftë më shumë se 1.9-përqindëshi i 2017-ës.
Në zgjedhjet e 11 majit, shumica dërrmuese e votuesve do të zgjedhin subjektin elektoral në krye të një prej 12 kolonave të fletës së votimit, si edhe emrin e kandidatit të tyre të preferuar në po atë kolonë. Por disa votues mund të ngatërrohen…
Në cilat raste do të konsiderohet e pavlefshme vota më 11 maj:
- Nqs votuesi zgjedh një ndër kandidatët e kolonës X, fjala vjen, por votën në krye e jep për subjektin elektoral të kolonës Y, vota i shkon dëm…
- Nqs votuesi zgjedh një ndër kandidatët e kolonës X, fjala vjen, por jep vota në krye për dy subjekte të ndryshme njëkohësisht, vota i shkon dëm…
- Nqs votuesi zgjedh njëkohësisht dy kandidatë nga kolona të ndryshme subjektesh elektorale, vota i shkon dëm…
- Nqs votuesi nuk preferon asnjë kandidat, por zgjedh njëherësh dy subjekte elektorale, vota kuptohet që i shkon dëm…
Në shumicën dërrmuese të skenarëve të mësipërm, gabimet mund të jenë të paparamenduara. Thresh disa votues mund të ngatërrohen padashje…
Në cilat raste do të konsiderohet e vlefshme vota më 11 maj
- Nqs votuesi zgjedh subjektin e kolonës X, fjala vjen, dhe votën personale e jep për një kandidat po të kolones X, vota është më se e vlefshme.
- Nqs votuesi e jep votën personale për një një kandidat të kolonës X, fjala vjen, por nuk zgjedh asnjë subjekt elektoral në krye të kolonave të subjekteve, vota është e vlefshme për kandidatin në fjalë, si edhe për subjektin e kolonës X.
- Nqs votuesi zgjedh subjektin elektoral në krye të kolonës X, fjala vjen, por voton për dy kandidatë të këtij subjekti njëkohësisht, vota është e vlefshme vetëm për subjektin e jo për kandidatët.
- Nqs votuesi zgjedh subjektin elektoral në krye të kolonës X, fjala vjen, por nuk voton për asnjë kandidat të këtij subjekti, vota vlen për këtë të fundit.
SHËNIM: Në folklorin elektoral qarkullojnë gojëdhana për nxjerrjen të pavlefshme të votave të partive të vogla nga ndonjë shenjë me stilolaps që shtojnë fshehurazi numëruesit e partive të mëdha. Por deri më sot, gojëdhana të tilla nuk janë provuar me pamje filmike gjatë numërimit të votave.