Dje ishte Festa e Myslimanëve, Dita e Fiter Bajramit.Kudo nëpër Shqiperi, ku ka komunitet mysliman, njërëzit faleshin dhe më pas festuan. Normalitet si çdo vit. Edhe në Shkodër mijëra njërëz dolën në faljen e Bajramit në qytetin e Shkodrës. Por pse është lajm ngjarja në qytetin verior të vendit? Ja se çka ndodhur. Myftiu Muhamed Sytari ishte duke mbajtur fjalën e tij përpara besimtarëve kur nisën të bien këmbanat e kishes. Të gjithë e pamë se si Myftiu Sytari ndaloi në mes të fjalës së tij e ku përpara kishte qindra e qindra myslimanë dhe tha me një gjest për t’u admiruar: “Po e ndërpres pak fjalën time derisa të mbarojnë kembanat e kishes, të një feje tjetër, që nuk është e jona,porse janë vëllëzërit tanë të krishterë e duhen respektuar”. Një gjest simbolik,por që flet shumë për vllazërinë fetare këtu në Shqipëri. E ka thënë edhe Papa Francesku kur erdhi në Tiranë se nuk është tolerancë por një vllazëri fetare që duhet marrë si shembull në botë.
Si të mos mjaftonte ky akt i shkëlqyer nga Shkodra dje në profilin e tij në facebook Dom Gjergj Meta, një nga emrat e njohur të drejtuesve të kishes katolike shqiptare, shkruan tekstualisht: “Sot telefonatën e parë ia bëra Durit. Kështu e thërras shokun tim të ngushtë me të cilin kam kaluar adoleshencën time e prej asaj kohe jemi ende shokë. Ai feston sot bashkë me familjen e tij Bajramin, madje edhe djalit të parë ia ka vu emrin Bajram.
Kur mendoj shpesh për ekstremizmin fetar me shkon mendja mënjëherë te Durimi dhe them me vete: Sido të jetë puna edhe në qofshin të gjithë përreth meje ekstremistë; myslimanë apo katolikë qofshin ata, që presin koka a vrasin me kallashnikov, Durimi (e bashkë me të edhe Romiri, Luani, Genti etj. etj.) do të vdisnin bashkë me mu dhe ne nuk do ta linim njeri – tjetrin vetëm.
Në xhenet apo në parajsë, ta quajmë si të duam, do të donim të shkonim bashkë sepse edhe jetën e jetuam bashkë…!
Të kesh guxim të jetosh jetën me të tjerët, është mënyra më e mirë për t’i thënë jo edhe të keqes, ekstremizmit, përjashtimit, inatit dhe urrejtjes …
Gëzuar festen!”
Dy ngjarje që flasin për një raport ekselent mes besimeve fetare në Shqipëri, por që fatkeqsisht e prishin disa sekte apo segmente nga këto komunitete që duan sherrin, luftën dhe shikojnë endërra që edhe në vendin tonë të ketë ekstremizma siç po ndodh në Siri e në vendet përreth saj.
E këtë vlerë mirëkuptimi, respekti dhe vllazërie e manifestuan dje kaq bukur e në mënyrë të natyrshme Myftiu i Shkodrës që ndaloi për pak caste faljen dhe Dom Gjergj Meta në Tiranë, duke nisur ditën me urimin e një shoku mysliman.
Kaq mjafton për dje !