Ka disa ditë që janë ngritur analistë, politikanë, botues dhe skalione biznesi ku po i fryjnë një sherri të dytë Rama-Meta. Në të vertetë ka një ftohje pas zgjedhjeve të 21 qershorit ku LSI u pre në besë hapur e pa mëshirë nga segmente të PS. Ka edhe një fakt ku LSI tregoi se ka rritje në vota, bile paksa të pabesueshme, porse votat janë aty brenda, në kuti, e janë tashmë zyrtare. Ka edhe një fakt që Pogradecin e Mallakastrën ia humbi vetëm PS, pra votuan kundër Ilir Metës dhe proBashës, socialistët e Edi Ramës. Ka edhe një fakt se Viktor Tusha i LSI, që kandidoi për kryebashkiak, thotë se PS-ja, ministrja Mimi Kodheli dhe një zv/ministër lezhjan punuan kundër Ilir Metës në Lezhë . Ka edhe një fakt të pamohueshëm se raportet Rama- Meta nuk janë aspak si para zgjedhjeve të 21 qershorit. Ka edhe një fakt se PS nuk e duron kurrsesi LSI-në oborrin e saj si të majtë, jo vetëm se i merr vota, por dhe pushtet të përkthyer më vonë në vota. Ka edhe një fakt se Berisha si një politikan i vjetër, ndonëse e do kokën e Ramës në litar, lëshon diversione, që deri diku janë të besueshme, duke kërkuar nëpërmjet “diversantëve” qeverisje të përbashkët PS-PD. Siç ka edhe sinjale dhe lojëra për një aleancë të dytë PD-LSI, por kjo për të bërë presion mbi Ramën. Megjithatë në politikë gjithçka përdoret dhe nuk ka më “Never say never” (“kurrë mos thuaj kurrë”) .
Të gjitha këto kanë krijuar një situatë jo miqësore mes PS e LSI. Aq më shumë se LSI kërkon me tepër pushtet në qeverisjen vendore, sepse ka marrë shumë vota, sa nuk e besonte edhe vetë Ilir Meta. Nëse ndodh, që nuk mund të ndodhë, një bashkëqeverisje PS-PD, pra që selia blu mbështet Ramën për një reformë të thellë, por pa futur ministra në kabinet, atëhere del se LSI kalon në opozitë. A e dëmton apo LSI-në kjo gjë, nëse ndodh, mbetet një ekuacion me shumë variabla. A dëmtohet PS nëse pranon paqe me PD, edhe kjo ha diskutime, por gjithsesi mund ta dëmtojë se shumë socialistë do të jenë të indinjuar nga vrasësit e tyre historikë. A është kjo lojë e sajuar mjeshtërisht nga Meta për të dëmtuar Edi Ramën, mëqënëse janë në periudha akulli mes kësaj kohe me supërtemperatura, edhe kjo mbetet në lojë. Sikurse mund të jetë e vertetë se dashuria e dytë mes Ramës dhe Metës ka mbyllur sezonin e saj dhe priten “fortuna”, si këto në mes të stinës së verës, si në Tetovë të Maqedonisë dje në darkë.