Kryetari i Kuvendit, Ilir Meta dhe kryeministri Edi Rama, prej gati dy muajsh kanë hedhur poshtë çdo mundësi për ftohje të marrëdhënieve të tyre, edhe pse nga të dy kampet është thënë se nuk i hapin telefonat njeri tjetrit pas 21 qershorit. Sërish dje, në dy intervista televizive, përsëritën refrenin e njohur. Rama tha në “Top Channel” se nuk kishte mungesë dialogu dhe se pyetjet për raportet në koalicion janë pa kuptim. Kurse kreu i Kuvendit në një intervistë për “Ora Neës” i quajti zërat për ndarje, si thashetheme vere. Sipas tij, ka plot mënyra të tjera për të komunikuar me Ramën. Deri në këtë pikë, duket çdo gjë normale, të paktën fasada. Mediat kanë dy muaj që shkruajnë për acarim të marrëdhënieve mes PS-së dhe LSI-së. Ndërsa Rama-Meta në intervista të sinkronizuara dalin dhe flasin për të kundërtën. Duket sikur janë mediat që nxisin sherrin dhe çdo gjë mes Metës e Ramës është vëllazërore. Por intervistat e Ramës dhe Metës duket se nuk bindin më jo opinionin, por as vetë drejtues kryesorë të Partisë Socialiste. Fatmir Xhafaj, kryetar i komisionit parlamentar të Ligjeve dhe një nga deputetët më të vjetër tashmë në PS e me integritet të lartë profesional në një prononcim për mediat, teksa ka folur për reformën në drejtësi, ai ka qenë më i qartë se gjithë deputetët e PS-së dhe LSI-së që kanë folur për marrëdhëniet në koalicion. Kështu, Xhafaj e ka nisur komentin e tij me frazën e përdorur deri në lodhje se “s’ka çarje mes PS dhe LSI”. Por pas kësaj, ai ka faktuar të kundërtën. Sipas tij, problemet nuk zgjidhen me anë të intervistave dhe dy kryetarët e partive duhet të tregojnë më shumë përgjegjshmëri. “Ka nevojë më shumë përgjegjshmëri në këtë bashkëqeverisje, në sensin e raporteve brenda koalicionit. Nuk më duket aspak serioze që shumë gjëra të trajtohen përmes deklaratave, intervistave apo Facebook-ut, kur ata që janë drejtuesit politikë të këtij koalicioni, nuk flas vetëm në nivel bashkëdrejtuesish, por edhe të strukturave të tjera të koalicionit, përfshirë grupet parlamentare, të mund të ulen e të trajtojnë çështje që janë të rëndësishme për vlerat e këtij koalicioni”, – tha Xhafaj.
Një deklaratë e tillë e bërë nga një prej eksponentëve më të vjetër në PS, nuk lë vend për shumë dyshime. Mes Metës dhe Ramës, komunikimi duket se kanë qenë vetëm intervistat dhe jo raportet si aleatë, apo si dy kryetarë të partive kryesore qeverisëse. Xhafaj fakton atë që është aluduar prej kohësh për raportet Rama-Meta, duke thënë se problemet zgjidhen sy më sy dhe jo me intervista e deklarata në Facebook. “Çështjet nuk zgjidhen me intervista, por duke parë njëri-tjetrin në sy e duke diskutuar hapur e me përgjegjshmëri”, – tha ai, duke shtuar se “qytetarët kërkojnë më shumë përgjegjshmëri nga dy kryetarët e koalicionit”. Pas kësaj, çdo deklaratë e Metës dhe e Ramës për të normalizuar situatën, duket se nuk ka aq shumë rëndësi. Kriza mes tyre jo vetëm ekziston, por në nisje të sesonit të ri parlamentar pritet të kthehet në një ngërç për vazhdimin e reformave. A është lojë pa top e të dyve, Ramës dhe Metës? Apo po luajnë e tallin tr… me publikun e ndërkohë rrijnë e hanë darkë me verë të kuqe të një biznesmeni të sukesshëm në Durrës që herë rri në Gjirin e Lalzit e shumëherë darkon në Jalë? Dhe nxjerrin bllof opozitën. Në të dyja rastet është gabim, prej të dyve. Ata janë dy numrat kryesorë të Shtetit dhe duhet të manifestojnë bashkëpërgjegjsi. Nëse duan të hanë njeri tjetrin, që nuk besohet kollaj, atëhere të shkojnë në zgjedhje të parakohshme dhe të matin forcat edhe mes tyre.
Fatmir Xhafaj ka përmendur dje reformën në drejtësi, e cila do të kërkojë edhe ndryshime në Kushtetutë. Partia Socialiste ka plan ndryshimin e një sërë nenesh që kanë të bëjnë me zgjedhjen e Presidentit, por edhe me reformën zgjedhore. Miratimi i ndryshimeve të tilla, edhe pse do të ishte më normale të kaloheshin me referendum, duket se do të bëhet në Kuvend. Një hap i tillë kërkon më shumë vota sesa kanë PS dhe LSI së bashku. Por në këtë situatë, kur marrëdhëniet PS dhe LSI nuk janë në ditët e mira, me çfarë garancie Partia Socialiste do të kërkojë të bëjë reforma? Apo pas ftohjes së kohëve të fundit mes dy partive kryesore të koalicionit fshihet pikërisht mosmarrëveshja për ndryshmet kushtetuese dhe ndonjë projekt i PS-së për të kërkuar votat e PD-së si në vitin 2008?!
Ndryshimi i humorit të marrëdhënieve PS-LSI nisi pas zgjedhjeve vendore, kur LSI-ja akuzoi PS-në për pazare me PD-në në disa zona ku ishin kandidatët e saj. Replikat kanë vazhduar edhe këto ditë mes ish-kandidatëve që akuzojnë PS-në dhe anasjelltas në bazë. Këtyre sherreve të vogla, deputetë të LSI-së u kanë shtuar dhe kritikat për situatën ekonomike dhe mungesën e vizionit të qeverisë, kuptohet për pjesën e PS-së në qeveri, lidhur me taksat. Së fundmi, janë dhe reforma në drejtësi dhe ndryshimet e mundshme në kabinetin qeveritar, për të cilat dy partitë duket se nuk janë në një linjë.
Por mundet të jetë edhe siç la të nënkuptojë Edi Rama dje se të mërkurën e parë të shtatorit do të ngjisë shkallët për tek zyra e Ilir Metës. I fusin një kafe, tokin duart dhe qeshin me ata që donin përçarje duke thënë: “Çfarë …. janë ata që e hëngrën !”.
Por kjo nuk është serioze. Më mirë të jenë në sherr se debati sjell zhvillim se sa të thonë duke qeshur, të dy, atë shprehjen e mësipërme!
Spiten P.