Seanca e Kuvendit të Kosovës është shoqëruar sot me tensione dhe përplasje mes deputetëve të Partisë Demokratike të Kosovës dhe atyre të Lëvizjes Vetëvendosje. Situata është tensionuar gjatë aktivitetit të organizuar nga Kuvendi për bashkatdhetarët, ku në sallën e seancave plenare ka hyrë edhe Donika Gërvalla, deputete e Vetëvendosjes dhe ministre në detyrë e Drejtësisë.
Gërvalla është përballur me deputetet e PDK-së, Blerta Deliu, Eliza Hoxha dhe Ganimete Musliu. Deputetet e PDK-së i kanë kërkuar vazhdimisht që të thirret seanca konstituive e Kuvendit, duke përsëritur thirrjet: “Thirre seancën” dhe “Boll me performanca, thirre seancën”. Në përgjigje, Gërvalla u ka bërë thirrje deputetëve të PDK-së që të marrin pjesë në takime për të gjetur një marrëveshje.
“Ejani në takim, pse s’po vini, pse po tuteni”, është shprehur Gërvalla. Përplasjet verbale kanë vazhduar edhe me deputetin e PDK-së, Artan Behrami. Ky i fundit e ka akuzuar Gërvallën se ka dërguar dosje në Gjykatën Speciale kundër Ushtrisë Çlirimtare të Kosovës. Gërvalla i është përgjigjur duke e mohuar akuzën: “Mos rrej”. Situata ka eskaluar më tej kur deputetja Ganimete Musliu ka hedhur ujë në drejtim të Gërvallës. Më pas, përplasja është zhvendosur te deputeti i Vetëvendosjes, Ardian Gola, ndaj të cilit deputetët e PDK-së kanë vazhduar kërkesën për thirrjen e seancës konstituive.
Tensionet janë shfaqur edhe në përplasjen me Arbërie Nagavcin, e cila në legjislaturën e kaluar ka drejtuar grupin parlamentar të Vetëvendosjes. Për shkak të situatës së krijuar, aktiviteti i Kuvendit me mërgatën është pezulluar përkohësisht, ndërsa përplasjet mes deputetëve kanë vazhduar në sallën e seancave plenare.