Drejtori i Përgjithshëm i Policisë së Shtetit, Skënder Hita, ka shprehur mirënjohjen dhe mbështetjen e tij për punonjësit e policisë, të cilët prej gjashtë ditësh po përballen me situata të vështira, orë të gjata shërbimi dhe akte dhune gjatë ushtrimit të detyrës. Përmes një letre të hapur drejtuar punonjësve të Policisë së Shtetit, Hita vlerësoi përkushtimin dhe profesionalizmin e tyre, duke dënuar çdo formë dhune ndaj uniformave blu. “Asnjë sulm ndaj jush nuk është i pranueshëm. Asnjë akt dhune nuk mund të justifikohet”, theksoi Hita, duke u bërë thirrje efektivëve të vijojnë detyrën me qetësi, vendosmëri dhe profesionalizëm, duke respektuar ligjin dhe dinjitetin e çdo qytetari.
LETËR E HAPUR PËR PUNONJËSIT E POLICISË SË SHTETIT
Të dashur kolegë,
Prej gjashtë ditësh po përballeni me situata të vështira, me orë të gjata shërbimi, tension dhe akte të rënda dhune. Shumë prej jush janë lënduar në krye të detyrës.
Sot dua t’ju shpreh personalisht mirënjohjen, respektin dhe mbështetjen time të plotë.
E di se pas çdo uniforme është një njeri, një prind, një bashkëshort, një bir apo një bijë, që dikush e pret me shqetësim në shtëpi.
Asnjë sulm ndaj jush nuk është i pranueshëm. Asnjë akt dhune nuk mund të justifikohet.
Ju kërkoj të vijoni detyrën me profesionalizëm, qetësi dhe vendosmëri, duke respektuar në çdo moment ligjin dhe dinjitetin e çdo qytetari.
U uroj shërim të shpejtë kolegëve të plagosur dhe ju siguroj se nuk do të jeni vetëm në përballimin e këtyre sfidave.
Jam krenar për çdo punonjës policie që i shërben vendit me ndershmëri dhe përkushtim.
Qëndroni të fortë, të bashkuar dhe besnikë ndaj misionit tuaj.
Me respekt dhe mirënjohje,
Skënder Hita
Drejtor i Përgjithshëm i Policisë së Shtetit
