Drejtuesi politik i Partisë Socialiste për qarkun e Tiranës, Taulant Balla, së bashku me kryetarin e bashkisë së Vorës, Blerim Shera, zhvilluan një takim me banorë të zonës së Prezës në kuadër të nismës “Punët e Shqipërisë”. Gjatë bashkëbisedimit, në fokus ishin zhvillimet ekonomike në vend, rritja e pagave dhe pensioneve, si dhe politikat mbështetëse për shtresat në nevojë.
Balla u shpreh se ekonomia shqiptare po ndjek një trend rritjeje të qëndrueshme. Duke u ndalur te turizmi, ai e cilësoi këtë sektor si një nga shtyllat kryesore të ekonomisë, duke theksuar rritjen e numrit të vizitorëve dhe të ardhurave. Sipas tij, Shqipëria ka arritur në 12,5 milionë turistë dhe rreth 5,7 miliardë euro të ardhura nga ky sektor.
Në vijim, Balla u ndal te mbështetja për zhvillimin lokal, duke veçuar iniciativën “Paketa e Maleve” dhe rolin e bashkisë në mbështetjen e qytetarëve që duan të investojnë dhe zhvillojnë aktivitetet e tyre. Në përmbyllje, ai ritheksoi perspektivën europiane të vendit, duke deklaruar se anëtarësimi në Bashkimin Europian është një objektiv i arritshëm brenda kësaj dekade, me synimin që deri në vitin 2030 Shqipëria të jetë pjesë e BE-së.
