Bordi i Zyrës së Rregullatorit të Energjisë e Kosovës (ZRRE) i ka miratuar kërkesat e tre operatorëve energjetikë për të hyrat e lejuara maksimale të premten, duke njoftuar se çmimi i rrymës është rritur për rreth 16 për qind.
Gjatë mbledhjes të mbajtur më 11 prill, Bordi i ZRRE-së nuk tregoi se sa do të rritej çmimi i rrymës, por Radio Evropa e Lirë nga burimet e saj mësoi se rritja do të ishte rreth 16 për qind.
Ndërkohë, pak orë pas vendimit të ZRRE-së, një numër qytetarësh protestuan në sheshin Zahir Pajaziti në qendër dhe pranë zyrës së rregullatorit në Pejton.
Operatori i Sistemit, Transmisionit dhe Tregut [KOSTT], Kompania për Distribuim të Energjisë Elektrike në Kosovë [KEDS] dhe Kompania Kosovare për Furnizim me Energji Elektrike [KESCO] kërkuan ngritjen e çmimit të tarifave të rrymës për shkak të importit të energjisë elektrike.
Bordi i ZRRE-së i miratoi kërkesat e tyre në mbledhjen e së premtes. Më herët, ZRRE-ja njoftoi se tarifat e reja do të hynin në fuqi më 1 maj.