Nesër (e enjte) do të mbahet seanca e fundit plenare në Kuvendin e Shqipërisë, pasi në muajin gusht të gjithë deputetët do të jenë me pushime. Seanca e së enjtes është shumë e rëndësishme.
Rendi i ditës parashikon raportimin e disa institucioneve për veprimtarinë e vitit të shkuar, ndërsa do të kalojnë ligje që kanë hasur jo pak kundërshtime nga opozita. E para për legalizimin e kanabisit mjekësor, atë të detyrimit të studentëve të mjekësisë për të punuar 5 vite në Shqipëri dhe konfiskimin e ndërtimeve pa leje. Për këto çështje opozita paralajmëron betejë kundër maxhorancës.
Studentët e mjekësisë do të jenë nesër në një protestë. Edhe pse nuk është reflektuar në rend të ditës, Kuvendi pritet të fusë për votim edhe projekt-ligjin për “Akademinë e Shkencave”, që i hap rrugë dhënies së mandatit të dytë në krye të Akademisë Skënder Gjinushit.
