
Pas shumë mbledhjesh me debate dhe tensione, sot opozita dhe mazhoranca kanë zhbllokuar punën në Komisionin Hetimor për PPP në Shëndetësi.
Palët kanë rënë dakord për planin e punës për dy javët e ardhshme, të cilat do të fokusohen në vëzhgimin e punës në terren për të parë si funksionojnë koncesionet për sterilizimin dhe check up.
Po ashtu me konsensus u vendos që seancat dëgjimore do të nisin në datën 3 qershor.
“Kjo është një pikë e parë e mirë për punën e komisionit. Kemi diskutuar në lidhje me një plan vizitash. Është dakordësuar që këtë javë dhe tjetrën në vijim, ndërkohë që pritet përgjigjja e kërkesave, u kemi lënë kohë 7 ditë institucioneve, është propozuar plani për vizitat në terren.
Është propozuar që të premten të zhvillojmë një vizitë në spitalin e Durrësit dhe më pas do të vendosim për vizitë në 1 ose 2 qendra shëndetësore apo laboratorë.
Të martën të bëjmë një vizitë te spitali i Traumës dhe do të diskutojmë nëse do të vizitojmë një qendër shëndetësore”, tha Vokshi.