Konferenca e katërt ndërqeveritare ndërmjet Shqipërisë dhe Bashkimit Europian do të zhvillohet më 14 prill 2025. Njoftimi është bërë publik në faqen zyrtare të Këshillit Evropian.
Gjatë kësaj konference pritet të hapen negociatat për grup-kapitullin 2, që lidhet me tregun e brendshëm. Ky kapitull përfshin rregulla dhe standarde që kanë të bëjnë me lëvizjen e lirë të mallrave, shërbimeve, kapitalit dhe punëtorëve brenda Bashkimit Europian.
Deri më tani, Shqipëria ka hapur negociatat dhe ka nisur punën për grup-kapitullin 1, që trajton shtetin e së drejtës, dhe grup-kapitullin 6, që lidhet me marrëdhëniet me jashtë.
Gjatë vizitës së fundit në Tiranë, përfaqësuesja e lartë e BE-së për Punët e Jashtme, Kaja Kallas, deklaroi se anëtarësimi i Shqipërisë në Bashkimin Europian deri në vitin 2030 është një objektiv i arritshëm, duke nënvizuar rëndësinë e zbatimit të reformave dhe forcimit të sundimit të ligjit.