Festivali i Këngës në Radio Televizionin Shqiptar po bëhet gati për edicionin e tij të 65-të, me 28 këngëtarë të përzgjedhur për të konkurruar në skenën e këtij eventi të rëndësishëm të muzikës shqiptare. Pas përfundimit të fazës së aplikimeve dhe shqyrtimit të kandidaturave nga komisioni përkatës, është konfirmuar lista e artistëve që do të jenë pjesë e këtij edicioni.
Procesi i aplikimit u zhvillua nga 22 deri më 27 shtator dhe u karakterizua nga interesimi i artistëve, kompozitorëve dhe krijuesve të muzikës së lehtë shqiptare, si nga Shqipëria dhe trevat e tjera shqipfolëse, ashtu edhe nga diaspora. Aplikimet u dorëzuan online, përmes formularëve të publikuar në faqen zyrtare të Festivalit.
Përzgjedhja e këngëve është bërë në përputhje me kriteret artistike dhe teknike të përcaktuara në rregulloren e Festivalit. Sipas këtyre kritereve, të gjitha këngët konkurruese duhet të interpretohen tërësisht në gjuhën shqipe, të kenë një kohëzgjatje maksimale prej katër minutash dhe të jenë krijime origjinale, të reja dhe të papublikuara më parë në asnjë platformë apo format publik.
Me interes pritet se kush do të jetë artisti/ja që do të përfaqësojë Shqipërinë në ”Eurovision Song Contest 2027”, që do të mbahet në Bullgari.
