Tottenham–Liverpool rrezikon të hyjë në histori jo vetëm për peshën e saj në Premier League, por edhe për numrin jashtëzakonisht të lartë të mungesave. Deri më tani numërohen plot 15 lojtarë potencialisht të padisponueshëm për një nga ndeshjet më të rëndësishme të fundjavës.
Situata është veçanërisht e ndërlikuar për Tottenhamin, i cili do të duhet të bëjë pa disa elementë kyç. Nuk do të jenë në dispozicion Dejan Kulusevski për shkak të një problemi në gju, Radu Dragușin dhe James Maddison për shkak të dëmtimeve në ligamentin e kryqëzuar, Kota Takai (kofshë), Dominic Solanke (kyç i këmbës), Destiny Udogie (biceps femoral), si dhe Pape Sarr dhe Yves Bissouma, të angazhuar me kombëtaret e tyre në Kupën e Afrikës.
As Liverpooli nuk vjen në momentin e saj më të mirë. Te “Reds” mungesat përfshijnë Giovanni Leoni (ligament i kryqëzuar), Jeremie Frimpong dhe Joe Gomez (biceps femoral), Cody Gakpo (dëmtim muskulor), Wataru Endo dhe Dominik Szoboszlai (kyç i këmbës), si dhe Mohamed Salah, i angazhuar në Kupën e Afrikës.
Nga ana e Liverpoolit ekziston gjithsesi një fije shprese, pasi Jeremie Frimpong dhe Dominik Szoboszlai mund të rikuperohen në kohë për ndeshjen e nesërme.