Marc-André ter Stegen vazhdon të përballet me vështirësi edhe pas largimit nga Barcelona. Portieri gjerman, i cili së fundmi u transferua te Girona, ka pësuar një dëmtim në kofshën e majtë që do ta mbajë jashtë fushave për një periudhë të gjatë.
Klubi katalanas ka bërë të ditur se gardiani 32-vjeçar do t’i nënshtrohet një ndërhyrjeje kirurgjikale të premten e ardhshme, pas dëmtimit të pësuar në ndeshjen kundër Real Oviedos.
“Marc-André ter Stegen do të operohet të premten për shkak të dëmtimit të marrë në sfidën ndaj Real Oviedos. Kohëzgjatja e mungesës së tij do të përcaktohet pas operacionit”, thuhet në njoftimin zyrtar.
Ky zhvillim hedh hije dyshimi mbi pjesëmarrjen e tij në Kupën e Botës, me rikuperimin që mbetet i paqartë deri pas ndërhyrjes. Një goditje e rëndë për ish-kapitenin e Barcelonës, i cili shpresonte të rikthehej protagonist në një kapitull të ri të karrierës së tij.