Gianluigi Donnarumma përjetoi një mbrëmje të vështirë në përballjen mes Manchester Cityt dhe Paris Saint-Germainit, e përfunduar me fitoren 4-2 të francezëve. Portieri italian mori kritika të ashpra nga mediat franceze, ndërsa pasardhësi i tij te PSG-ja, Matvei Safonov, u vlerësua maksimalisht.
Për Donnarummën, kjo ishte një ndeshje me ngarkesë të veçantë emocionale, pasi përballej me ish-skuadrën e tij, nga e cila u largua në verën e vitit 2025. Megjithatë, paraqitja e tij nuk i bindi kritikët francezë.
Gazeta prestigjioze L’Équipe i dha portierit italian notën 2, duke e konsideruar përgjegjës për golin e Akliouche, i cili ndihmoi PSG-në të shuante shpresat e Manchester Cityt për përmbysje.
Sipas mediave franceze, Donnarumma shfaqi pasiguri në disa momente të ndeshjes, përfshirë golin e Doué dhe pasimet e gjata, ndërsa në një rast u shpëtua nga shtylla. As pritja e penalltisë së Ferran Torres në fund të takimit nuk mjaftoi për të ndryshuar vlerësimin për të.
Në krahun tjetër, mediat franceze vlerësuan paraqitjen e Matvei Safonov, portierit që ka zënë vendin e titullarit te PSG-ja.
Gardiani rus mori notën 7 nga L’Équipe, Le Parisien dhe Le Figaro. Kjo e fundit e përmblodhi paraqitjen e tij me një koment domethënës: “Të mërkurën, numri një i vërtetë nuk ishte Donnarumma, por ai”.