Situata e Cristiano Ronaldos me Kombëtaren e Portugalisë vazhdon të shkaktojë diskutime, ndërsa kësaj radhe një nga zërat më të njohur të futbollit francez ka dhënë një paralajmërim të fortë për yllin portugez.
Bixente Lizarazu, kampion bote me Francën në vitin 1998, ka komentuar zhvillimet rreth Ronaldos në një intervistë për të përditshmen portugeze “Record”. Ish-mbrojtësi francez kritikoi mënyrën se si është menaxhuar situata, duke përfshirë vetë Ronaldon, Federatën Portugeze të Futbollit dhe trajnerin Jorge Jesus.
Sipas Lizarazus, mënyra se si është trajtuar çështja përbën një gabim të rëndë, ndërsa veçoi një element që, sipas tij, ka qenë njëkohësisht edhe forca dhe dobësia e sulmuesit portugez: egon.
“Egoja ka qenë forca e Cristianos, por tani është armiku i tij më i madh. Ai ka arritur në këtë moshë dhe rrezikon të përfundojë në varrezat e elefantëve. Ju garantoj për këtë”, deklaroi Lizarazu.
Një deklaratë e fortë, sidomos duke pasur parasysh statusin e Ronaldos si një prej futbollistëve më të mëdhenj në historinë e këtij sporti. Pesë herë fituesi i “Topit të Artë” është ende një prej figurave kryesore të Portugalisë, por e ardhmja e tij me përfaqësuesen mbetet në qendër të vëmendjes.
Fjalët e Lizarazus vijnë në një moment delikat për Portugalinë, teksa diskutimi nuk lidhet vetëm me kontributin që Ronaldo mund të japë në fushë, por edhe me mënyrën se si duhet menaxhuar roli i tij në një fazë të avancuar të karrierës.