Debati mes “lojës së bukur” dhe “rezultatit me çdo kusht” vazhdon të jetë i pafund dhe pa një të vërtetë absolute. Qasje të ndryshme, filozofi të kundërta, por një element mbetet i pakundërshtueshëm: fusha dhe numrat. Dhe pikërisht shifrat po i japin të drejtë Milanit të Massimiliano Allegrit.
Mund të flitet për fat, dhe sigurisht që edhe ai ka rolin e vet në futboll, por pas 20 javësh kampionat, të dhënat janë tepër të forta për t’u reduktuar në një analizë sipërfaqësore. Pas suksesit në Como, për Milanin dhe për Allegrin, është e qartë se ka shumë më tepër sesa rastësi.
Në “Sinigaglia” protagonist ishte Mike Maignan, vendimtar mes shtyllave, si edhe Adrien Rabiot, autor i golave vendimtarë. Por përtej emrave të spikatur të mbrëmjes, ka edhe të dhëna të tjera domethënëse. Rafa Leão, ka qenë një nga lojtarët më ndikues në fazën ofensive: që nga ajo ndeshje, vetëm Lautaro Martinez ka marrë pjesë në më shumë gola se portugezi. Leão numëron 9 kontribute direkte, me 7 gola dhe 2 asistime.
Ecuria pozitive shtrihet edhe te lojtarë të tjerë, me disa ende me hapësira të mëdha për rritje, si Nkunku apo Fullkrug. Pikërisht ky potencial i pashfrytëzuar plotësisht përbën një sinjal inkurajues në perspektivë afatgjatë.
Duke u kthyer te shifrat kryesore, Milani ka arritur një seri prej 19 ndeshjesh radhazi pa humbje në Serie A (12 fitore dhe 7 barazime), një arritje që nuk regjistrohej që nga periudha janar–maj 2005, kur në stol ishte Carlo Ancelotti. Fitorja në Como i shtohet kështu 40 pikëve të grumbulluara më parë. Pas 20 javësh kampionat, renditja e sheh Milanin në vendin e dytë, tri pikë pas Interit dhe tri pikë përpara Napolit.