Trajneri i Real Madridit, José Mourinho, ka dalë në mbrojtje të Vinicius Junior, i cili kohët e fundit është kritikuar për paraqitjet e tij dhe është përballur me vërshëllimat e tifozëve kundërshtarë.
Në konferencën për shtyp para sfidës së La Ligës kundër Villarrealit, tekniku portugez shprehu keqardhjen për gjendjen emocionale të brazilianit, duke theksuar përkushtimin e tij për t’u rikthyer në formën më të mirë.
“Ajo që më dhemb dhe më trishton është të kuptoj se ai dëshiron të jetë në maksimumin e tij, të jetë lojtari që vendos ndeshjet dhe bën diferencën. Më dhemb ta shoh duke vuajtur. Është një djalë që, për habinë time të madhe, është i jashtëzakonshëm dhe punon jashtëzakonisht shumë për t’u rikthyer në nivelin më të lartë”, u shpreh Mourinho.
Trajneri theksoi se Vinicius meriton mbështetjen e tifozëve, pasi u ka dhuruar atyre shumë emocione në të kaluarën.
“Unë nuk e kritikoj kurrë tifozërinë e Real Madridit, thjesht e respektoj. Por më thyhet zemra kur shoh një djalë si ai, që në këtë moment nuk është pikërisht Viniciusi i jashtëzakonshëm që njohim, dhe shoh njerëzit, të ndikuar nga shumë prej jush, që nuk e mbështesin. Ai e meriton mbështetjen. Nuk dëshiron asgjë tjetër veçse të jetë Viniciusi që u ka dhuruar kaq shumë gëzim tifozëve të Realit”, shtoi portugezi.