Paris Saint-Germain nuk do të zbresë në fushë në Mynih vetëm për të mbrojtur fitoren 5-4 të ndeshjes së parë ndaj Bayern Munich. Trajneri i parisienëve, Luis Enrique, e bëri të qartë në konferencën për shtyp se objektivi i vetëm i skuadrës së tij mbetet fitorja dhe sigurimi i një vendi në finalen e madhe në Budapest.
“Qëllimi ynë është të fitojmë. Kemi bërë një punë shumë të mirë deri tani, por tani duhet të japim diçka më shumë për të arritur në finale”, deklaroi tekniku spanjoll në prag të sfidës vendimtare.
Enrique theksoi se pret një ndeshje të ngjashme me atë të parë, duke vlerësuar maksimalisht kundërshtarin: “Për ta arritur këtë, duhet të mposhtim Bayern-in, një skuadër sensacionale. Nuk besoj se ndeshja do të jetë ndryshe nga ajo e parë, sepse asnjëra skuadër nuk pranon të jetë inferiore ndaj tjetrës. Kjo mund të sjellë sërish një spektakël të madh”.
Sipas tij, përballja mes dy ekipeve më të forta aktualisht në Europë do të jetë e nivelit më të lartë dhe do të vendoset nga detajet. “Është një skenar emocionues për të gjithë. Të dyja skuadrat kanë të njëjtin objektiv dhe kjo e bën sfidën edhe më të fortë”, shtoi ai.
Trajneri i PSG-së u ndal edhe te avantazhi minimal i ndeshjes së parë, duke paralajmëruar lojtarët e tij të mos e nënvlerësojnë situatën: “Kemi një avantazh të vogël, por kjo nuk do të thotë asgjë. Të dyja skuadrat patën momentet e tyre dhe gjithçka mbetet e hapur. Do të jetë shumë e rëndësishme të kontrollojmë emocionet”.
Në fund, Enrique kujtoi edhe suksesin e një viti më parë në të njëjtin stadium, por theksoi se kjo nuk ndikon në motivimin aktual: “Është një kujtim i bukur, por nuk na jep motivim shtesë. Ne jemi tashmë në maksimumin tonë”.