Thirrjes së Barcelonës i është përgjigjur Real Madridi. Pas fitores së thellë 5-0 të katalanasve ndaj Athletic Bilbaos, “Los Blancos” siguruan biletën për finalen e Superkupës së Spanjës duke mposhtur 2-1 Atletico Madridin në gjysmëfinalen tjetër.
Edhe pa Kylian Mbappé, skuadra e drejtuar nga Xabi Alonso triumfoi në derbin madrilen falë një goli spektakolar të Federico Valverdes që në minutën e dytë dhe realizimit të Rodrygos në minutën e 55-të. Reagimi i “Colchoneros” erdhi shpejt me golin e Sørloth në minutën e 58-të, por nuk mjaftoi për të ndryshuar fatin e takimit.
Një ndeshje e luftuar dhe me ritëm të lartë, ku Reali tregoi pjekuri dhe cinizëm në momentet vendimtare, duke mbajtur avantazhin deri në fund për të siguruar kualifikimin.
Tashmë gjithçka është gati për aktin final: do të jetë sërish El Clasico ai që do të vendosë fituesin e Superkupës së Spanjës, në një përballje që premton spektakël mes dy rivalëve historikë.