Atmosfera në “Santiago Bernabéu” mbetet e tensionuar. Vetëm pak ditë pas eliminimit nga Champions League kundër Bayernit, Real Madrid u përball me reagimin e ashpër të tifozëve të vet, të cilët nuk kursyen kritikat edhe pse skuadra fitoi 2-1 ndaj Alavés.
Në shënjestër përfunduan disa prej protagonistëve kryesorë të sezonit. Kylian Mbappe u prit me fishkëllima që në nxehje dhe në prekjet e para të topit. Sulmuesi francez reagoi në fushë duke shënuar golin e tij të 41-të sezonal, por festimi ishte i vakët: vetëm disa buzëqeshje drejt shokëve të skuadrës dhe asnjë gjest ndaj tribunave, një sinjal i qartë i tensionit të krijuar.
Situata nuk ishte më e mirë as për Vinícius Júnior, i cili u fishkëllye gjatë gjithë ndeshjes, pavarësisht se realizoi golin e dytë për madrilenët. Braziliani zgjodhi të kërkonte falje me një gjest drejt tifozëve gjatë festimit.
Edhe Eduardo Camavinga nuk i shpëtoi kritikave. Futja e tij në pjesën e dytë u shoqërua me reagime negative nga publiku, kryesisht për shkak të kartonit të kuq të marrë në ndeshjen ndaj Bayern.
Një kapitull më vete ishte rasti i talentit argjentinas Franco Mastantuono. I futur në lojë në vend të Arda Güler, ai u prit me një valë të fortë fishkëllimash. Sezoni i vështirë për 17-vjeçarin konfirmohet nga statistikat modeste (3 gola dhe 1 asist), mungesa e hapësirave si me trajnerin Xabi Alonso ashtu edhe me Álvaro Arbeloa, si dhe episodet negative, përfshirë një përjashtim ndaj Getafe për protesta.